|
بسم اللہ الرحمٰن الرحیم
حرام کی قدیم مگر مروج شکلیں
اس عنوان کے تحت حرام کی وہ شکلیں تحریر کی جا رہی ہیں جو دور جاہلیت سے چلی آرہی ہیں البتہ رسول اکرم صلی اللہ علیہ وسلم نے صحابہ کرام رضی اللہ عنہم کو ایسی تمام صورتوں سے منع فرمایا اور صحابہ کرام رضی اللہ عنہم بھی نبی کریم صلی اللہ علیہ وسلم کے حکم پر جان نچھاور کرنے والے تھے اُنھوں نے آپ صلی اللہ علیہ وسلم کے اوامرونواہی کو دل وجان سے تسلیم کیا مگر جیسے جیسے ہم عہد نبوی صلی اللہ علیہ وسلم عہد صحابہ کرام رضوان اللہ عنہم اجمعین اور عہد تابعین رحمہم اللہ سے دور ہوتے چلے گئے ویسے ویسے اُس سنہری دور کے فیوض و برکات سے بھی محروم ہوتے چلے گئے اور ہمارے اپنے منفی طرز عمل نے ہمیں ذلت و پستی کے گھٹا ٹوپ اندھیروں میں دھکیل دیا، جس کا نتیجہ یہ نکلا کہ ہم حلال و حرام میں امتیاز کئے بغیر اسلامی تعلیمات سے یکسر منحرف ہو کر، دنیا کی حرص و حوس کو اپنے دلوں میں سجائے، حصول دُنیاء کو اپنا مقصد بنائے،یہود و نصاریٰ کا طرز اپنائے اور راتوں رات کروڑ پتی بننے کی ذمہ داری اُٹھائے روز گار کی تلاش میں اُٹھ کھڑے ہوئے اور دور جاہلیت کی تقریباً وہ تمام معاشی اصطلاحات جنہیں نطق رسالت صلی اللہ علیہ وسلم کے ذریعہ اللہ جل جلالہ نے حرام کیا ہے ہم نےپھر سے انہیں اپنے اُوپر حلال کر لیا ہے(الاماشاء اللہ) اللہ جل جلالہ ہمیں سُودی معیشت سے بچائے اور اسلامی تعلیمات پر عمل پیرا فرمائے۔(آمین)
|