اجتماعی نظام

عورتوں سے مصافحہ کرنا

السلام علیکم ورحمة اللہ وبرکاتہ

برمنگھم سے محمد افضل دریافت کرتےہیں کیا عورتوں  سے مصافحہ کرنا جائز ہے او ر اس میں  مسلم و غیر مسلم کا کوئی فرق ہے؟ اگر کوئی بزرگ عمر رسیدہ ہو تو وہ مصافحہ کرسکتا ہے ۔ نیز بعض مسلم ملکوں میں دیکھا گیا ہے کہ لوگ اپنی رشتہ دار عورتوں کو بوسہ بھی دیتےہیں ۔ اس بارے میں شرعی حکم کیا ہے؟

الجواب بعون الوہاب بشرط صحة السؤال

وعلیکم السلام ورحمة اللہ وبرکاتہ!

الحمد للہ، والصلاة والسلام علیٰ رسول اللہ، أما بعد!

غیر محرم عورتوں سے مصافحہ جائز نہیں اور قرآن و سنت کے احکام سے تو یہ معلوم ہوتا ہے کہ یہ حرام کاموں میں سے ہے اور بعض اوقات یہ فعل فحاشی اور گناہ کے ارتکاب کا سبب بنتا ہے۔ قرآن میں جب عورتوں کو غیر محرموں کے سامنے زینت اور بناؤسنگھار کے اظہار سےمنع کیا گیا ہے۔۔۔۔۔کیونکہ یہ بھی اسباب فتن میں سے ہے۔۔۔۔تو مصافحہ کے ذریعہ اس طرح کے امکانات اور زیادہ ہیں اور پھر حدیث میں نبی کریم صلی اللہ علیہ وسلم نے واضح طور پر فرمایا:

انی لا اصافح النساء۔ (سنن نسائی مترجم ج ۳ کتاب البیعت باب بیعة النساء ص ۱۵۴ رقم الحدیث ۴۱۸۷)

‘‘میں عورتوں سے مصافحہ نہیں کرتا۔’’

حضرت عائشہ رضی اللہ عنہا فرماتی ہیں:

مامست بد رسول اللہ صلی اللہ علیہ وسلمید امراةقط حین البیعة انما کان یبایعہن بالکلام۔ (فتح الباری ج ۹ کتاب التفسیر باب اذاجاء کم المؤمنات مہاجرات ص ۶۲۷ رقم الحدیث ۴۸۹۱وص ۴۶ رقم الحدیث ۲۷۱۳)

‘‘یعنی رسول اللہ صلی اللہ علیہ وسلم کے ہاتھ نے کبھی کسی عورت کے ہاتھ کو نہیں چھوا تھا بلکہ آپ عورتوں سے بیعت بھی زبانی طور پر لیتے تھے۔

اور اس سلسلے میں مسلم وغیر مسلم میں کوئی فرق نہیں بلکہ غیر مسلم خواتین کو اسلام کے احکام بتانے چاہئیں تا کہ اگر کسی مجبوری کی وجہ سےایک آدھ بار ہاتھ ملا بھی لیاتو آئندہ اس کام سےاحتیاط کرے۔جہاں تک کسی بزرگ یاعمر رسیدہ آدمی سے کسی عورت کے مصافحہ کرنےکا تعلق ہے تو جب رسول اکرم صلی اللہ علیہ وسلم نے یہ کام  ناپسند فرمایا ہے تو کسی اور بزرگ کا کیا اعتبار کیا جاسکتا ہے۔ موجودہ دور میں بعض لوگ  جو بیعت کے نام پر عورتوں کےہاتھ اپنے ہاتھ میں لیتےہیں یا ان سے علیحدگی اور خلوت میں ملاقاتیں کرتےہیں یہ سب ناجائز ہیں۔ اسی طرح غیر محرم عورتوں کا بوسہ بھی حرام ہے بلکہ اس میں مصافحہ سے بھی زیادہ فتنہ انگیزی کا خطرہ پایا جاتا ہے ۔ اس لئے مصافحہ ہو یا بوسہ ’ غیر محرم عورتیں چاہے کہ رشتہ دار ہی کیوں نہ ہوں’ ہرگز جائز نہیں اور اس کے حرام ہونے پر مسلم علماء کا اجماع اور اتفاق ہے۔

ھذا ما عندی واللہ اعلم بالصواب

فتاویٰ صراط مستقیم

ص458