{اِنَّ الـصَّلـٰوۃَ کَانَتْ عَـلـٰی الْـمُؤْمـِنِیْنَ کِتَابَاً مَّوْقُوْتاً} ۔’’ بے شک نماز مؤمنوں پر مقررہ اوقات میں فرض ہے ‘‘ اور روزے کے بارے میں سورۂ بقرہ ،آیت :۱۸۵ میں ارشادِ الٰہی ہے :{ فَمَنْ شَہِدَ مِنْکُمُ الشَّہْرَ فَلْیَصُمْہُ } ۔ ’’ جو شخص ماہِ رمضان کو پائے ، وہ روزے رکھے ۔‘‘اور حج کے بارے میں سورۂ بقرۃ ، آیت :۱۹۷ میں فرمانِ الٰہی ہے : { اَلْحَجُّ أَشْہُرٌ مَّعْلُومٰتٌ } ۔ ’’ حج کے مہینے معلوم و مقرر ہیں ۔‘‘اسی طرح ہی جہاد اور زکوٰۃ کے لیٔے بھی مخصوص شرائط واوقات ہیں ۔2 دوسری وہ عبادات ہیں جن کی ادائیگی کیلئے نہ وقت کی کوئی قید ہے نہ مقام کی ، نہ اُن کیلئے کوئی خاص شرائط مقرر ہیں نہ ہی کوئی مخصوص ہیئت و صورت بلکہ آدمی اپنے مکان میں ہو یا دوکان میں، سفر میں ہو یا حضر میں ، بیٹھا ہوا ہو یا لیٹا ہوا ، وہ ہر وقت ، ہر آن اور ہر موقع ومحل پر اِس عبادت کو ادا کرسکتا ہے ۔ خواہ زبان سے کرے یا دل سے ۔ اُنہی عبادتوں کو قرآن و سنت میں تسبیح(سُبْحَانَ اللّٰہ ِکہنا) ،تہلیل(لَا اِلـٰـہَ اِلَّا اللّٰہُ کہنا ) ، تحمید (اَلْحَمْدُ لِلّٰہِ کہنا )،تکبیر (اَللّٰہُ أَکْبَرُ کہنا )، استعاذۃ (أَعُوْذُ بِاللّٰہِ مِنَ الشَّیْطَانِ الرَّجِیْمِ پڑھنا)، استغفار(أَسْتَغْفِرُ اللّٰہَ کہنا) اور ذکر ودعاء کرنا جیسے ناموں سے یاد کیا گیا ہے ۔پہلی قسم کی عبادات فرض قرار دی گئی ہیں ، اور دوسری قسم کی عبادات فرض تونہیں قرار دی گئیں، مگر اپنے روحانی اثر ونتیجہ کے اعتبار سے ان کی حیثیت واہمیت کچھ کم بھی نہیں ہے ۔ یہی وجہ ہے کہ قرآن وسنت میں دعاء والتجاء کا حکم بھی دیا گیا ہے ، ترغیب بھی دلائی گئی اور تاکید بھی فرمائی گئی ہے ۔