یہ حدیث بیان کرکے حضرت ام حبیبہ رضی اللہ عنہا نے فرمایا : ( مَاتَرَکْتُہُنَّ مُنْذُ سَمِعْتُہُنَّ مِنْ رَّسُوْلِ اللّٰہِ صلی اللہ علیہ وسلم )یعنی ’’ میں نے جب سے ان بارہ رکعات کے بارے میں رسول اللہ صلی اللہ علیہ وسلم سے یہ حدیث سنی ہے تب سے انہیں کبھی نہیں چھوڑا ۔‘‘[ مسلم : ۷۲۸ ] اور ان بارہ رکعات کی تفصیل سنن الترمذی میں موجود ہے ، چنانچہ حضرت ام حبیبہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے ارشاد فرمایا : ( مَنْ صَلّٰی فِیْ یَوْمٍ وَّلَیْلَۃٍ ثِنْتَیْ عَشْرَۃَ رَکْعَۃً بُنِیَ لَہُ بَیْتٌ فِیْ الْجَنَّۃِ : أَرْبَعًا قَبْلَ الظُّہْرِ ، وَرَکْعَتَیْنِ بَعْدَہَا ، وَرَکْعَتَیْنِ بَعْدَ الْمَغْرِبِ ، وَرَکْعَتَیْنِ بَعْدَ الْعِشَائِ ، وَرَکْعَتَیْنِ قَبْلَ الْفَجْرِ ) ترجمہ : ’’ جو شخص دن اور رات میں بارہ رکعات پڑھتا ہے اس کیلئے جنت میں ایک گھر بنا دیا جاتا ہے : ظہر سے پہلے چار ، اور اس کے بعد دو ، مغرب کے بعد دو ، عشاء کے بعد دو ، اور فجر سے پہلے دو رکعا ت ۔‘‘[الترمذی : ۴۱۵۔ وصححہ الألبانی ] اور حضرت عائشہ رضی اللہ عنہا بیان فرماتی ہیں کہ رسول اکرم صلی اللہ علیہ وسلم نے ارشاد فرمایا :( مَنْ ثَابَرَ عَلَی اثْنَتَیْ عَشْرَۃَ رَکْعَۃً مِّنَ السُّنَّۃِ بَنَی اللّٰہُ لَہُ بَیْتًا فِیْ الْجَنَّۃِ : أَرْبَعُ رَکْعَاتٍ قَبْلَ الظُّہْرِ ، وَرَکْعَتَیْنِ بَعْدَہَا ، وَرَکْعَتَیْنِ بَعْدَ الْمَغْرِبِ ، وَرَکْعَتَیْنِ بَعْدَ الْعِشَائِ ، وَرَکْعَتَیْنِ قَبْلَ الْفَجْرِ ) ترجمہ :’’ جو شخص نمازِ سنت کی بارہ رکعات کی ادائیگی پر ہمیشہ کوشاں رہا ، اس کیلئے اللہ تعالی جنت میں ایک گھر بنا دیتا ہے : ظہر سے پہلے چار ، اور اس کے بعد دو ، مغرب کے بعد دو ، عشاء کے بعد دو ، اور فجر سے پہلے دو رکعات‘‘ [ الترمذی : ۴۱۴ ، ابن ماجہ : ۱۱۴۰ ۔ صححہ الألبانی ]