درس عبرت و موعظتمولانا ابوالکلام آزاد رحمہ اللہ عید الفطرعید آمد و افزود غمم را غم دیگرماتم زدہ را عید بود ماتم دیگردنیا کی ہر قوم کے لیے سال بھر میں دو چار دن ایسے ضرور آتے ہیں ، جن کو وہ اپنے کسی قومی جشن کی یادگار سمجھ کر عزیز رکھتی ہے، اور قوم کے ہر فرد کے لیے ان کا ورود عیش و نشاط کا دروازہ کھول دیتا ہے۔ مسلمانوں کا جشن اور ماتم، خوشی اور غم، مرنا اور جینا، جو کچھ تھا ، اللہ کے لیے تھا۔﴿ قُلْ إِنَّ صَلَاتِي وَنُسُكِي وَمَحْيَايَ وَمَمَاتِي لِلَّـهِ رَبِّ الْعَالَمِينَ ﴾’’کہہ دے کہ میری نماز، میری تمام عبادت، میرا مرنا، میرا جینا، جو کچھ ہے اللہ کے لیے ہے، جو تمام جہانوں کا پروردگار ہے ۔‘‘[1]اوروں کا جشن و نشاط لذائذ دنیوی کے حصول اور انسانی خواہشوں کی کامجوئیوں میں تھا، مگر ان کے ارادے مشیت الٰہی کے ماتحت اور خواہشیں رضائے الٰہی کی محکوم تھیں ۔