| ہیں۔ لیکن یہ نہیں بتاتے کہ یہ حضرات ملت کے نمائندگان کس حیثیت سے ہوتے ہیں اور انہیں سند نمائندگی کون دیتا ہے؟ ہم کم علم تو اتنا ہی جانتے ہیں کہ قرآنی الفاظ میں حج مالی اور بدنی ہر لحاظ سے ہر صاحب استطاعت پر فرض ہے کیا ملت کی نمائندگی کے لئے یہی اوصاف کافی ہیں۔ ہم اس نظام ربوبیت اور اسلامی معاشرہ کے قیام کے داعی سے یہ بھی پوچھنا چاہتے ہیں کہ ملت کے لئے لائحہ عمل اور اس کی تفصیلات طے کرنا قرآنی الفاظ میں "اولی الامر" اور صاحبان استنباط حضرات کا کام ہے یا عرفات اور منیٰ جیسے میدانوں میں لاکھوں افراد کا؟ اسی طرح ہماری دانست میں قربانی کے گوشت کا مصرف خود قرآن مجید نے(فکلوا منھا و اطعمو القانع والمعتر) (سورۃ الحج: آیت 36) کے الفاظ میں بتادیا ہے۔ ہم مسٹر پرویز سے مطالبہ کرتے ہیں کہ بین الاقوامی ضیافت والی آیت کی نشان دہی فرمائیں۔ ان ضمنی گزارشات کے بعد ہم بین الاقوامی ضیافت کے پرویزی تصور پر تنقید کرتے ہیں۔ پرویز صاحب اپنے ایک مضمون میں اس اعتراض (کہ جب قربانی کے لئے کوئی حکم اور کوئی سند موجود نہیں تو ہزار برس سے یہ کس طرح متواتر چلی آ رہی ہے اور اس کے خلاف کسی نے آواز کیوں نہ اٹھائی) کا جواب دیتے ہوئے فرماتے ہیں۔ |