| خوش ہو ہو کے گلاں کرنیاں ہانیاں وچ جاں بہناں ہاسے نال بابے صمصام نوں بکری والا کہناں ایک دن کیہا صمصام نے اگوں پچھنا واں میں تینوں کِدّاں جائز تینوں ’بکری والا‘ آکھیں مینوں گکھڑوی نے کیہا تیرا تھوہ نئیں ایدھر گیا یونس نوں دس اللہ نے مچھلی والا نئیں کیہا جد خدا نے یونس نوں مچھلی والا کیہا میں جے بکری والا کیہا میرا جرم کی رہیا فوراً گھر پورا کر دیندا ساہمنے جیہڑا آوے احمد دین دے اگے بول کے کتھے کوئی جاوے مولوی احمد دین دے سارے سخن سنکھے ہندے لاجواب، جواب ایہ جداں گھڑ کے رکھے ہندے ایہو جئیا، اجل مناظر، کتھوں لبھ لیایے اوہدی سیٹ تے اوہدے بدلے کہنوں ہن بٹھائیے دین دے سلسلے اندر خدمتاں ودھ ودھ کے اپنائیاں مرن والے نوں، اللہ نے سی، خوبیاں بہت عطائیاں اللہ جنت عدن، عطاوے کرے قبول دعائیں احمد دین گکھڑوی جیسے گھر گھر جم دے نائیں ٭٭٭ |