اس آیت کا شانِ نزول یہ ہے کہ ایک آدمی نے رسول اللہ صلی اللہ علیہ وسلم سے سوال کیا کہ کیا ہمارا رب قریب ہے کہ ہم آہستہ سے اسے پکاریں ،یابعید ہے کہ اونچی آواز سے پکاریں ؟ آپ صلی اللہ علیہ وسلم خاموش ہوگئے تو آیت:{ وا ذا سألک عبا دی…} نازل ہوئی ۔ اس آیت ِکریمہ میں دعا میں بغیر آواز کے مناجات کرنے کی تعلیم دی گئی ہے ،رسول اللہ صلی اللہ علیہ وسلم کا یہ فرمان بھی ا س بات پر دلالت کرتا ہے: [ان الذی تدعونہ أ قرب ا لی أ حد کم من عنق راحلتہ]ترجمہ:[جس ذات کو تم پکارتے ہووہ تو تمہاری سواری کی گردن سے بھی زیادہ تمہارے قریب ہے] یہ آیت اور حدیث اس بات پر دلالت کرتی ہیں کہ اللہ تعالیٰ دعاکرنیوالے سے قریب ہوتا ہے اور اس کی دعا قبول فرماتا ہے،البتہ یہ قرب اس کے علو(بلندی) کے منافی نہیں ہے، کیونکہ دونوں باتیں ثابت اور برحق ہیں ،اور حق میں تناقض نہیں ہوتا ،اور اس لئے بھی کہ اللہ تعالیٰ کی جمیع صفات میں کوئی بھی اس کا مثل نہیں ہے۔ لہذا یہ سوال کرنا غلط ہے کہ اگر اللہ تعالیٰ اپنی مخلوق کے اوپر ہے تو ان کے ساتھ کیسے ہوسکتا ہے؟ کیونکہ یہ سوال دراصل ایک غلط تصور کی بناء پر ہے ،وہ اللہ تعالیٰ کو مخلوق پر قیاس کرنا ہے اور یہ قیاس بالکل باطل ہے ،کیونکہ اللہ تعالیٰ فرماتا ہے: { لَیْسَ کَمِثْلِہٖ شَیْئٌ } اللہ تعالیٰ کی عظمت ،کبریائی ،احاطہ اور یہ کہ ساتوں آسمان اللہ تعالیٰ کے ہاتھ میں ایسے ہیں جیسے کسی بندے کے ہاتھ میں رائی کا دانہ ہو،کے پیشِ نظر قرب اور علو اس کے حق میں جمع ہوسکتے ہیں ،بھلا جس ذات کی یہ عظمت ہو اس کے حق میں یہ بات کیسے محال ہوسکتی ہے کہ وہ عرش پر ہونے کے باوجود ،جس طرح وہ چاہے مخلوق کے ساتھ بھی ہو۔ نصوصِ کتاب وسنت اور اجماعِ علماء ملت اس بات پر دلالت کرتے ہیں کہ اللہ تعالیٰ ا پنی مخلوق کے ساتھ قرب کی حالت میں بھی اپنی مخلوق سے بلند ہے ،اور عرش پرہونے کی حالت میں بھی اپنی مخلوق کے قریب ہے اور یہ صرف اللہ تعالیٰ کی خوبی ہے۔ |
Book Name | عقیدہ فرقہ ناجیہ |
Writer | فضیلۃ الشیخ الدکتور صالح بن فوزان بن عبداللہ الفوزان |
Publisher | مکتبہ عبداللہ بن سلام لترجمۃ کتب الاسلام |
Publish Year | |
Translator | علامہ عبداللہ ناصر رحمانی |
Volume | |
Number of Pages | 352 |
Introduction | زیر نظر کتاب جس کے مصنف الدکتور صالح بن الفوزان رحمہ اللہ ہیں ، یہ کتاب دراصل شیخ السلام ابن تیمیہ رحمہ اللہ کی مشہور زمانہ کتاب العقیدۃ الواسطیۃ کی جامع ترین شرح ہے۔ اس کا اردو ترجمہ علامہ عبداللہ ناصر رحمانی صاحب حفظہ اللہ نے کیا ہے۔کتاب کا بنیادی موضوع اللہ تعالیٰ کے اسماء وصفات کا قرآن وحدیث کے ادلہ سے اثبات ہے، نیزیہ کہ اسماء وصفات پر منہج سلف صالحین صحابہ وتابعین کے مطابق بلاتکییف ،بلاتحریف، بلاتشبیہ اور بلاتأویل ایمان لانا ضروری ہے۔ ایمان باللہ جو ایمان کا رکنِ اول ہے کی اساس توحید ہے اور فہمِ توحید،اللہ تعالیٰ کے اسماء وصفات کے فہم پر موقوف ہے،لہذا اس علم پر بہت توجہ کی ضرورت ہے ، زیر نظر کتاب اس باب میں انتہائی نافع کتاب ہے۔ |