مصنف رحمہ اللہ ان آیات کو پیش کرکے اللہ تعالیٰ کیلئے صفتِ محبت ومودت کا اثبات کررہے ہیں ،یعنی اللہ تعالیٰ بعض اشخاص، اعمال اور بعض اخلاق سے محبت کرتا ہے ،اوربعض سے محبت نہیں بھی کرتا ۔اس کا یہ محبت کرنا اور نہ کرنا اس کی حکمتِ بالغہ کے عین مطابق ہے ،چنانچہ اللہ تعالیٰ احسان کرنے والوں ،انصاف کرنے والوں ،تقویٰ والوں،اپنے رسول کی اتباع کرنے والوں ، اپنی راہ میں جہاد کرنے والوں،توبہ کرنے والوں اور طہارت وپاکیزگی اختیار کرنے والوں،سب سے محبت کرتا ہے۔ ان آیا ت میں محبت من الجانبین کا بھی اثبات ہے :(یعنی محبت من جانبِ بندہ اور محبت من جانبِ رب تعالیٰ )چنانچہ ان دونوں آیات میں غور کرنے سے یہ نکتہ حاصل ہوتا ہے : ’’یُحِبُّھُمْ وَیُحِبُّوْنَہٗ ‘‘ ’’ اِنْ کُنْتُمْ تُحِبُّوْنَ اللّٰه فَاتَّبِعُوْنِیْ یُحْبِبْکُمُ اللّٰه ‘‘ ان آیات میں جہمیہ اور معتزلہ کا رد ہے ،جو محبت من الجانبین کی نفی کرتے ہیں ، ان کا کہنا ہے : لایُحَبُّ ولایُحِبُّ یعنی ’’اللہ تعالیٰ نہ تو محبت کیا جاتا ہے اور نہ ہی کرتا ہے ۔‘‘ بندوں کی اللہ تعالیٰ سے محبت کی تاویل ،عبادت واطاعت سے کرتے ہیں ،اور اللہ تعالیٰ کی بندوں سے محبت کی تاویل، بندوں پر احسان کرنے اور انہیں ان کے اعمال کا ثواب دینے سے کرتے ہیں۔ ان کی یہ تاویل باطل ہے ،کیونکہ اللہ تعالیٰ کی بندوں سے محبت ،اسکی شایانِ شان ، مبنی برحق حقیقت ہے،جس طرح اس کی دیگر صفات ہیں،اوراللہ تعالیٰ کی محبت ومودت بندوں کی محبت ومودت جیسی نہیں ۔ |
Book Name | عقیدہ فرقہ ناجیہ |
Writer | فضیلۃ الشیخ الدکتور صالح بن فوزان بن عبداللہ الفوزان |
Publisher | مکتبہ عبداللہ بن سلام لترجمۃ کتب الاسلام |
Publish Year | |
Translator | علامہ عبداللہ ناصر رحمانی |
Volume | |
Number of Pages | 352 |
Introduction | زیر نظر کتاب جس کے مصنف الدکتور صالح بن الفوزان رحمہ اللہ ہیں ، یہ کتاب دراصل شیخ السلام ابن تیمیہ رحمہ اللہ کی مشہور زمانہ کتاب العقیدۃ الواسطیۃ کی جامع ترین شرح ہے۔ اس کا اردو ترجمہ علامہ عبداللہ ناصر رحمانی صاحب حفظہ اللہ نے کیا ہے۔کتاب کا بنیادی موضوع اللہ تعالیٰ کے اسماء وصفات کا قرآن وحدیث کے ادلہ سے اثبات ہے، نیزیہ کہ اسماء وصفات پر منہج سلف صالحین صحابہ وتابعین کے مطابق بلاتکییف ،بلاتحریف، بلاتشبیہ اور بلاتأویل ایمان لانا ضروری ہے۔ ایمان باللہ جو ایمان کا رکنِ اول ہے کی اساس توحید ہے اور فہمِ توحید،اللہ تعالیٰ کے اسماء وصفات کے فہم پر موقوف ہے،لہذا اس علم پر بہت توجہ کی ضرورت ہے ، زیر نظر کتاب اس باب میں انتہائی نافع کتاب ہے۔ |