قرض کے فضائل ومسائل

امام بخاری نے ایک باب کا درج ذیل عنوان تحریر کیا ہے:

[بَابٌ لِصَاحِبِ الْحَقِّ مَقَالٌ، وَیُذْکَرُ عَنِ النَّبِيِّ صلي اللّٰه عليه وسلم:’’ لَيُّ الْوَاجِدِ یُحِلُّ عِرْضَہُ وَعُقُوْبَتَہُ۔][1]

[حق دار کے تقاضا کرنے کے استحقاق کے متعلق باب اور نبی کریم صلی اللہ علیہ وسلم سے روایت نقل کی گئی ہے:’’دولت مند کا لیت و لعل اس کی عزت اور سزا کو حلال کردیتا ہے۔ ‘‘]

امام ابن حبان نے اس حدیث پر درج ذیل عنوان لکھا ہے:

[ذِکْرُ اِسْتِحْقَاقِ الْمَاطِلِ إِذَا کَانَ غَنِیًّا لِلْعُقُوْبَۃِ فِيْ النَّفْسِ وَالْعِرْضِ لِمَطْلِہِ۔][2]

[ٹال مٹول کرنے والے کے، غنی ہونے کی صورت میں، ٹال مٹول کی وجہ سے نفس اور عزت میں سزا کا مستحق ہونے کا بیان]

علمائے حدیث … رحمہم اللہ تعالیٰ … نے[عزت کے حلال ہونے]کے معنی کو خوب واضح کیا ہے۔ ذیل میں ان میں سے چند ایک کے اقوال ملاحظہ فرمائیے:

۱: امام سفیان نے اس کی شرح میں لکھا ہے:’’ أَذَاہُ بِلِسَانِہِ۔ ‘‘[3] … ’’ قرض خواہ کو اپنی زبان سے اس کو اذیت دینے کا حق ہے۔ ‘‘

۲: امام وکیع نے اس کی شرح میں تحریر کیا ہے:’’ شِکَایَتُہُ ‘‘[4] … ’’ کہ وہ لوگوں کے روبرو اس کی عدم ادائیگی کا تذکرہ بطورِ شکوہ کرسکتا ہے۔ ‘‘

۳: امام عبداللہ بن المبارک نے اس کی شرح میں بیان کیا ہے:’’ یُغَلِّظُ لَہُ ‘‘[5] ’’کہ وہ اس کے ساتھ سخت کلامی کرسکتا ہے۔ ‘‘