|
جذبۂ عشقِ حقیقت سے دمکتی ہوئی رات سیرتِ پاکِ محمد سے مہکتی ہوئی رات
عرش سے فرش پہ عظمت کے برستے ہوئے پھول شبِ اسریٰ میں نثارِ قدمِ پاکِ رسول
ہے دوعالم میں لقب رحمتِ داور اس کا بٹ گیا خلقِ دوعالم میں نچھاور اس کا
ما عرفناک ہے تعبیرِ کمالِ عرفاں قُربِ محبوب کی خلوت میں تکلف کی زباں
برق رو بن گئی معراج میں عقلِ کونین اس کے قدموں سے تھی وابستہ بشکلِ نعلین
سوئے افلاک بڑھا سم کو جھٹک کر جو براق چونک اٹھا خواب سے انساں کا شعورِ آفاق
کھل گئیں پوری طرح عقلِ بشر کی آنکھیں نئی دنیا میں تھیں اب اہلِ نظر کی آنکھیں
ذہنِ انساں کو نئی قوّتِ پرواز ملی اہلِ دل کو طلبِ جلوہ گہِ راز ملی
جو حقائق تھے کئی لاکھ برس سے مخفی چند صدیوں میں بنے علم کی آیاتِ جلی
|