نعت گوئی اور اس کے آداب

عبدالعزیز خالد ؔکے ہاں ملت اسلامیہ پر خارجی حملے سے داخلی انتشار کی زیادہ اہمیت ہے اور حقیقت بھی یہی ہے کہ اگر امت واقعی رسول اللہ صلی اللہ علیہ وسلم کی تعلیمات پر پوری طرح کار بند رہتی تو اس کی عظمت و شوکت کو کبھی زوال نہ آتا اور کسی بیرونی طاقت کو اس پر غلبہ حاصل نہ ہوتا۔

وہ ملت کی ایک ایک خامی پر دل گرفتہ ہیں کہ اس ملت کو عدل سے رغبت نہیں رہی۔ Ē أَوْفُوا بِالْعُقُودِ Ě (وعدے پورے کرو) کو اِنھوں نے کالعدم قراردے دیا ہے۔ عقل ودانش سے اِنھیں نفرت ہے۔

اللہ کے بندے مال وزر کے بندے بن گئے ہیں۔ احترامِ آدمیت اِن کے ہاں سے اٹھ گیا ہے۔

واعظ کی خطابت نے اس امت کو بے عمل بنادیا ہے۔

اہلِ منبر کتابوں کے دشمن ہیں مگر ام الکتاب (قرآن) اور الحدیث (فرامین نبوی) کے وارث بنے بیٹھے ہیں:

دور دورہ اس میں ہے حرص و فریب و فند کا

ضعفِ ایمانی سے ڈھیلی پڑ گئی اس کی کماں

اب نہیں خصلت کوئی اس میں دیانت نام کی

رزقِ طیب کے تصور ہی سے ہے یہ سرگراں

بغض، انصاف و دیانت سے ہے اس کو منتہیٰ

اُن کے ذکرِ خیر میں رہتی ہے گو رطب اللساں

ملتِ بیضا ولایاتِ فقیہاں میں بٹی

اب ہیں سر خلقِ خدا کے اور تیغِ بے اماں