مباحث توحید،تفسیر جواہر القرآن اور تفسیر تبیان الفرقان کا تقابلی مطالعہ

کفارِمکہ کے لیے آپ کی نبوت کو ماننے اور قبول کرنے کے متعلق کوئی عذر باقی نہیں رہا‘اس لیے فرمایا:پس تم رسولِ برحق پر ایمان لے آؤ تو یہ تمہارے لےی بہت بہتے ہے‘اور اگر تم نے ان کے کفر کو اختیار کیا اور کفر پر برقرار رہے تو اللہ تعالیٰ کی ملکیت میں تمام موجودات ہیں اللہ تعالیٰ اُن کے خالق اور مالک ہیں اور ان پر تصرف فرمانے والے ہیں اور اللہ تعالیٰ کی ملکیت سے کوئی چیز خارج نہیں ہے پس وہ تم سے اور تمہارے علاوہ سب سے مستغنی ہیں۔ان کو تمہارے کفر سے کوئی نقصان نہیں پہنچتا اور وہ تمہیں عذاب دینے پر قادر ہیں اور اللہ تعالیٰ تمام احوال کے جاننے والے ہیں۔[1]

(د)اللہ تعالیٰ کی الوہیت اور توحید کا مزید ذکر:

’’وَهُوَ الْقَاهِرُ فَوْقَ عِبَادِهِ وَهُوَ الْحَكِيمُ الْخَبِيرُ‘‘ اس آیت میں اور اس سے پہلی آیت میں اللہ تعالیٰ کی توحیدکا ذکر ہے جس میں اللہ تعالیٰ نے یہ خبر دی ہے کہ بندوں کو جو ضرر اور سختی پہنچتی ہے اس کو دور کرنے والے صرف اللہ عزوجل ہیں‘اور جو اُن کو خیر حاصل ہوتی ہے تو اس خیر کو پہنچانے والے بھی صرف اللہ عزوجل ہیں‘اور اللہ تعالیٰ نے یہ خبر دی کہ وہی ہر چیز پر قادر ہیں۔اور اللہ تعالیٰ تمام بندوں پر غالب ہیں‘قادر ہیں اور اس کی بندوں پر سلطنت قائم ہے اور تمام بندے اللہ تعالیٰ کی سلطنت کے تحت سرنگوں ہیں‘اس آیت میں اللہ تعالیٰ نے فرمایا:’’وہ اپنے بندوں پر فوق ہیں‘‘یعنی سر بلند ہیں اور عظیم ہیں اور وہ الحکیم ہیں ‘یعنی ہر چیز کو اس کے لائق جگہ پر رکھتے ہیں اور الخبیر ہیں وہ جانتے ہیں جو کچہ بندے چھپاتے ہیں اور جو کچھ ظاہر کرتے ہیں‘ان پر کوئی چیز مخفی نہیں ہے۔اور بندوں کو جو ضرر اور سختی عارض ہو تو اللہ عزوجل کے سوا کوئی اس کو دور نہیں کر سکتا‘اور اللہ تعالیٰ کے سوا بندوں میں سے کوئی کسی کو نفع نہیں پہنچا سکتا۔[2]