آپ دیکھیں گے کہ ہر آیت،دوسری آیت کی تفسیر کررہی ہے اور ایسے معنی پر مشتمل ہے ،جو دوسری آیت کے معنی سے مطابقت رکھتاہوتاہے۔ جہاں تک احادیثِ رسول صلی اللہ علیہ وسلم کا تعلق ہے ، توہمارے موقف کے مطابق ، وجوبِ حجاب کیلئے بہت سی احادیث ثابت ہیں ، ان احادیث میں شرعی حجاب کے بیان اور ثبوت وتأکد کی مختلف صورتیں اورشکلیں ثابت ہیں۔ جہاں تک سلف صالحین کے آثار کا تعلق ہے، توصحابۂ کرام وتابعین عظام سے ایسا بہت کچھ منقول اورثابت ہے جن سے عورت کیلئے،اجنبی مردوں سے چہرے کا ڈھانپنا، وجوباً ثابت ہوتاہے،یہ آثار اس لئے بڑی اہمیت کے حامل ہیں کہ یہ صحابہ وتابعین اہلِ علم بھی ہیں اور عربی لغت کے ماہربھی۔ ان دلائل کے ساتھ ساتھ،عقلی دلالت کا اضافہ کرلیجئے،نیز یہ کہ چہرہ کے حجاب یا ترکِ حجاب میں راجح مصلحت کا کیاتقاضہ ہے،بھی شامل کرلیجئے،پھر ان پر مستزاد مسلمانوں کا اجماع بھی ۔ اب ہم ان آیاتِ مبارکہ کاذکر کرتے ہیں،جوصراحتاً چہرے کے حجاب کے وجوب پر دال ہیں،کسی بھی قسم کی تاویل کے بغیر۔ ہمارے رسالہ کے آئندہ کے صفحات میں بھی آپ کوجابجا ،قرآنی دلائل ملیں گے، جن کیلئے آپ متنبہ رہیں۔ (۱)اللہ تعالیٰ نے فرمایا ہے: [وَاِذَا سَاَلْتُمُوْہُنَّ مَتَاعًا فَسْـَٔــلُوْہُنَّ مِنْ وَّرَاۗءِ حِجَابٍ۰ۭ ذٰلِكُمْ اَطْہَرُ لِقُلُوْبِكُمْ وَقُلُوْبِہِنَّ] (الاحزاب:۵۳) ترجمہ:اور جب تم اُن (عورتوں ) سے کسی چیز کا سوال کرو تو پردہ کے پیچھے سے سوال کرو،یہ تمہارے اور اُن کے دلوں کی پاکیزگی کا باعث ہے ۔ |
Book Name | چہرے اور ہاتھوں کا پردہ |
Writer | فضیلۃ الشیخ علی بن عبداللہ النمی |
Publisher | مکتبۃ عبداللہ بن سلام لترجمۃ کتب الاسلام |
Publish Year | |
Translator | فضیلۃ الشیخ عبداللہ ناصر رحمانی |
Volume | ایک جلد |
Number of Pages | 222 |
Introduction | زیر نظر کتاب علی بن عبداللہ النمی کی تالیف ہے اور اس کا اردو ترجمہ فضیلۃ الشیخ عبداللہ ناصر رحمانی صاحب حفظہ اللہ نے کیا ہے، اس کتاب میں خواتین کے پردے کے حوالے سے سیر حاصل بحث کی گئی ہے، اس میں ایسے تمام شبہات کا تعاقب کیا گیا ہے جن پر ان لوگوں کا اعتماد تھا جو مسلم خاتون کو بے پردگی کی دعوت دینے میں کوشاں و حریص ہیں،کتاب بنیادی طور پر دو ابواب میں منقسم ہے ، ایک باب میں ان شبہات کا جائزہ لیا گیا ہے جو چہرے کے پردے سے متعلق ہیں اور دوسرا باب ہاتھوں کے ڈھانپنے کے وجوب سے متعلق شہبات کے ازالے پر مشتمل ہے۔ |