نور الھدی و ظلمات الظلال فی ضوء الکتاب والسنۃ

یہ متقیوں کے اوصاف کریمانہ ہیں جنہیں اللہ تعالیٰ ایسے باغات میں داخل کرے گا جن میں ہمہ قسم کے درخت اورمیوہ جات ہوں گے اور بہتے چشمے ہوں گے جن سے وہ باغات سیراب ہوں گے اور ان باغات سے اللہ کے تقویٰ شعار بندے سیراب و شکم سیر ہوں گے[1]۔

یہ متقیوں کے اوصاف کے چند نمونے اور مثالیں ہیں ورنہ کتاب و سنت میں ان کے اوصاف بکثرت موجود ہیں۔

چوتھا مسلک:تقویٰ کے ثمرات:

تقویٰ کے کچھ ثمرات ہیں جو تقویٰ شعار شخص کو دنیا و آخرت میں حاصل ہوں گے اور ان ثمرات کے حصول کی پیش رفت متقیوں کے اوصاف پر کار بند ہونے کے اعتبار سے ہوگی‘ ان میں سے بطور شمار نہیں بطور مثال چند ثمرات حسب ذیل ہیں:

(1)قرآن کریم سے استفادہ اور ہدایتِ ارشاد و توفیق سے سرفراز ی:اللہ عز وجل کا ارشاد ہے:

﴿الم(١)ذَٰلِكَ الْكِتَابُ لَا رَيْبَ ۛ فِيهِ ۛ هُدًى لِّلْمُتَّقِينَ(٢)﴾[2]۔

الم،اس کتاب کے(اللہ کی کتاب ہونے)میں کوئی شک نہیں‘ پرہیز گاروں کو راہ دکھانے والی ہے۔

(2)متقیوں کو اللہ کی معیت:

اللہ عز وجل کا ارشاد ہے:

﴿وَاتَّقُوا اللّٰهَ وَاعْلَمُوا أَنَّ اللّٰهَ مَعَ الْمُتَّقِينَ(١٩٤)﴾[3]۔

اور اللہ کا تقویٰ اختیار کرو اور جان لو کہ اللہ متقیوں کے ساتھ ہے۔

نیز ارشاد ہے:

﴿إِنَّ اللّٰهَ مَعَ الَّذِينَ اتَّقَوا وَّالَّذِينَ هُم مُّحْسِنُونَ(١٢٨)﴾[4]۔