|
یہاں یہ بات بھی پیشِ نظر رہے کہ جب طواف مکمل ہوجائے تو سمجھدار خصوصاً سات سال اور اس سے زیادہ عمر کے بچوں کو اپنے ساتھ ہی مقامِ ابراہیم کے پاس دو رکعتیں پڑھائیں کیونکہ سات سال کی عمر کے بچوں کو نماز کا حکم دینے اور دس سال کے ہوکر بھی جو بچے نہ پڑھیں تو انھیں مار کر پڑھانے کا حکم تو نبی صلی اللہ علیہ وسلم نے عام حالات میں دیاہے چہ جائیکہ حرم شریف اور موسمِ حج ہو۔ چنانچہ سنن ابو داود و ترمذی، مسند احمد اور مستدرک حاکم میں ارشادِ نبوی صلی اللہ علیہ وسلم ہے:
(( مُرُوْا أَوْلَادَکُمْ بِالصَّلَوٰۃِ اِذَا بَلَغُوْا سَبْعاً وَاضْرِبُوْھُمْ عَلَیْھِا اِذَا بَلَغُوْا عَشْراً )) [1]
’’اپنے بچوں کو جب وہ سات سال کے ہوجائیں تو نماز کاحکم دیں اور جب دس سال کے ہو کر بھی پابندی سے نہ پڑھیں تو انھیں مار کر پڑھائیں۔‘‘
ویسے حرم شریف تک پہنچ جانے والے بچے تو خوش نصیب اور باسعادت ہی ہو سکتے ہیں وہ تو خود ہی ذوق وشوق کے ساتھ ایسے امور سرانجام دیتے ہیں۔
جب مقامِ ابراہیم پر دو رکعتیں پڑھ لیں تو پھر انھیں بھی اپنے ساتھ لے جاکر خوب جی بھر کر آبِ زمزم پئیں اور پلائیں اور جہاں اپنے لیے دین ودنیا کی بھلائیوں کی دعائیں مانگیں وہیں ان نونہالوں کے روشن دینی و دنیاوی مستقبل، ورع وتقویٰ اور صحت ودرازیٔ عمر کی دعائیں بھی کریں، کیونکہ آبِ زمزم پیتے وقت کی گئی
|