ارمغان مورخ اہل حدیث مولانا محمد اسحاق بھٹی

انھیں دا گھر وی ھِ، تے دفتر وی، وڈے ڈکھ دی گالھ ایہہ ھِ، جو گالھیں کرن آلے ڈھیر، پر ہتھ گڈاون کنوں سبھّے واندے ہِن، چھڑے کجھ گینڑویں اللہ دے بانھیں ہِن، جنہاں دا تعاون اَٹّے وچ لُون جِتّی وی اوکھا پُجدے۔ میں سمجھداں جو خان صاحب دی نیّت خالص اللہ دی رضا کیتے ھِ، تڈاہوں ایہہ گاڈا رِڑھدا پے۔ جیون جوگا آپنی قلمی محنت نال گھر دی گزران ٹوری کھڑے، علمی ادبی کم کار کوں ہمت تے حوصلے نال اگونہاں کیتی ویندے، اُتوں آئے گے دی خدمت داری اُتر ئِ چ ہِس۔ ایں نینگر دا جذبہ تے حوصلہ قابلِ رشک ھِ، جو ہتھ پلّے کجھ نہ ہوون پاروں وی ہمت نِسی ہاری، تے آپنے کم کار کوں جھُپّیا وَدّے۔ مطالعہ اِتّی ہِس جو وسیب دی تاریخ دا حافظ ھِ، اللہ جانے کتھوں کتھوں پَٹ پھرول کر، مقامی وہاگی مہاندرے، ادیب دانشور، شعراء تے علماء، جنھیں کوں اَج کوئی جاندا وی کینی، انھیں دے حالات چُن پچن جوڑی کھڑے، رب کوئی سانگا بنایا تاں ان شاء اللہ ایندا ایہہ پورھیا ہک ڈینہہ منظر عام تے آویسی۔ خان صاحب اِتھوں دے تاریخی حوالے نال کجھ معلومات بھٹی صاحب رحمہ اللہ کوں وی پیش کیتیاں ہَن، جہڑیاں انہاں آپنیاں کتاباں وچ خان صاحب دے حوالے نال درج کر چھوڑن۔ ایندے علاوہ انھیں دیاں ترئے(۳)کتاباں وی چھپ گن۔ پہلی کتاب ’’پیامِ مصطفی صلی اللہ علیہ وسلم کی کرنیں ‘‘، ڈوجھی کتاب سیرت دے موضوع تے ھِ ’’رسول اللہ صلی اللہ علیہ وسلم کے متعلق مستشرقین کے اعترافات‘‘، تے تریجھی کتاب وچ قرآنِ پاک وچوں توحید بارے آیتاں دے حوالے نال توحیدِ ربانی کوں نِشابُر کیتے، اوندا ناں ھِ ’’موضوعات القرآن فی توحید الرحمن‘‘۔

پَر سال حضرت قاری عبدالوکیل صدیقی رحمہ اللہ دی شخصیت تے انھیں دیاں دینی خدمات بارے ’’قاری عبدالوکیل صدیقی نمبر‘‘، تفہیم الاسلام دا خاص شمارہ، جہڑا(۱۷۶)صفحیاں تے دِگھریا ہویا ھِ، شائع کیتے۔ ایں سال سئیں مولانا محمد اسحاق بھٹی رحمہ اللہ دی شخصیت، تے انھیں دیاں علمی ادبی خدمات دے اعتراف ئِ چ خاص ایڈیشن بناون دا پروگرام ہا۔ پَر اللہ دی گِنڑیں ایویں ہئی، جو اللہ سئیں بھٹی صاحب رحمہ اللہ کوں سنبھال گھداتے ایہہ ایڈیشن انھیں دی حیاتی ئِ چ نہ چھَپ سگیا۔ بھٹی صاحب رحمہ اللہ ۲۲؍ دسمبر ۲۰۱۵ء کوں آپنی حیاتی دے(۹۱)سال پورے کرتے ایں دنیا توں ٹُر گے۔ اللہ انھیں دیاں لغزشاں کنوں درگزر کرے، تے انھیں کوں جنت الفردوس وچ آپنے خاص انعامات نال نوازے، آمین

بھٹی صاحب رحمہ اللہ دی وفات دے بعد ادارہ ’’تفہیم الاسلام‘‘ کوں ایہہ اعزاز حاصل ئِ جو ایں پاکستان وچ سب کنوں پہلے بھٹی صاحب رحمہ اللہ دی شخصیت تے انھیں دے علمی ادبی پورھئیے تے یادگار خاص شمارہ جوڑ بناتے پیش کیتے۔ ایں توں علاوہ سئیں حمیداللہ خان عزیز، بھٹی صاحب رحمہ اللہ دے خطوط، خطبات تے انٹرویوزتے وی کم پورا کیتی کھڑن، جہڑا جو اجھو چھپ تے منظر عامتے آ ویسی، ان شاء اللہ۔ اللہ تعالیٰ برادر خان صاحب کوں مزید ہمت ڈیوے، تے انھیں دے کم کار وچ آسانیاں پیدا کرے، تے انھیں دا پورھیا لایاسجایا تھیوے، شالا صحت دی بادشاہی ہووِس۔ آمین